Siglir tar il cuntegn

Header

cuntegn

Exteriur Il president da la Pologna Duda conferma lescha dispitaivla

La regenza polacca cuntinuescha cun sia refurma da giustia dispitaivla. Quai malgrà la critica da l’Uniun europeica. Il president Andrzej Duda ha suttascrit ina nova versiun da la lescha davart la dretgira constituziunala. Per l’UE è la constituziunalitad periclitada.

La regenza naziunal-conservativa da la Pologna cuntinuescha cun la refurma da giustia quai malgrà gronda critica da la cumissiun da l’Uniun europeica. Il president Andrzej Duda ha suttascrit ina nova versiun da la lescha davart la dretgira constituziunala. Uss po la lescha ir en vigur duas emnas suenter la publicaziun en ils organs uffizials.

Rinfatschas da l’UE

Per la cumissiun da l’UE vegn l’independenza da la dretgira restrenschida ed era las decisiuns da la dretgira na vegnan betg resguardadas. Gia l’emna passada aveva la cumissiun da l’UE admoni la Pologna da far midadas vid la lescha ils proxims sis mais. Quai ha communitgà la chanzlia presidiala.

Tenor il viceschef da la cumissiun europeica, Frans Timmerans, n’è dentant era questa nova versiun betg avunda per garantir il stadi da dretg en Pologna.

La cumissiun da l’UE aveva dà trais mais peda a la regenza da chattar ina soluziun cuntentaivla. Uschiglio smanatscha ella a la Pologna cun sancziuns. Crititgà vegn cunzunt ch'il stadi polac veglia engrevgiar la lavur da la dretgira constituziunala.

RR novitads 15:00

Artitgels legids il pli savens