Las unitads iracaisas hajan cumplettamain sut controlla il territori da cunfin tranter l'Irac e la Siria. Perquai ha al-Abadi proclamà la sonda la «fin da la guerra cunter l'SI» en ina conferenza a Bagdad. La gievgia aveva il minister da defensiun russ medemamain proclamà la victoria cunter la milissa da terror – numnadamain en la Siria.
95% dal territori è puspè en mauns da l'Irac
Ed ussa sajan ils dschihadists en l'Irac cumbattids cumplettamain, conferma era il general-litinent Abdul-Amir Jarallah ch'è responsabel per l'operaziun militara en il vest da la regiun da desert. Tenor indicaziuns da la coaliziun ha la milissa da terror pers 95% da ses territori. Ina coaliziun internaziunala manada dals Stadis Unids ha sustegnì l'offensiva cun attatgas or da l'aria. Cumenzà aveva l'expulsiun dals extremists gia ils davos mais.
Betg la fin da l'SI
La victoria en l'Irac na muntia però betg la fin da l'SI. Ils extremists vegnan a sa concentrar sin l'activitad en auters pajais. Uschia hai en l'Afghanistan dà numerusas attatgas entras la milissa. Era il dumber d'attatgas da terror pudess s'augmentar. Quai sa mussa era en la citad Kirkuk en la part dal nord da l'Irac: tschintg attentaders da suicid èn sa siglientads en l'aria – probablamain extremists da l'SI.
In cumbat da passa trais onns
Il fanadur 2014 aveva la milissa da terror occupà grondas parts da la Siria e l'Irac. Entras in'offensiva aveva il Stadi Islamic stgatschà enavos l'armada iracaisa e las truppas curdas enfin Erbil e Bagdad. Tar il punct culminant da la pussanza da la milissa da terror ha il manader da l'SI Abu Bakr al-Bagdadi proclamà in «califat» ed ha elegì sasez sco «calif». Dapi il 2015 vegnan ils terrorists dentant puspè stgatschads enavos.
RR novitads 12:00