Siglir tar il cuntegn

Header

Retg Bhumibol Adulyadej è mort.
Legenda: Il retg da la Tailanda Bhumibol era il monarc il pli ditg en uffizi dal mund. Keystone
cuntegn

Exteriur Il retg da la Tailanda Bhumibol è mort

70 onns è Bhumibol Adulyadej stà retg da la Tailanda. Uss è il monarc fitg venerà mort. La sanadad da l'um d’88 onns era gia dapi in temp betg pli uschè buna. Plirs observaturs teman ina fasa da malruaus.

Il retg da la Tailanda Bhumibol Adulyadej è mort en la vegliadetgna d’88 onns en in ospital a Bankok. Il monarc fitg popular en il pajais era gia dapi il 2009 a l’ospital, quai cun pitschnas interrupziuns. Gia quest onn era retg Bhumibol vegnì operà vid il tscharvè ed il cor.

Ina pitga per la democrazia

Bhumibol seseva dapi il 1946 sin il tron. Uffizialmain bain senza pussanza politica – en ses 7 decennis temp da regenza ha il retg però vis 20 emprovas da putsch en il pajais, suttascrit passa 20 constituziuns e vinavant nominà anc dapli schefs da regenza novs. Ses tron valeva sco ina pitga da la democrazia en la Tailanda. El sez sco in garant per l’unitad e la stabilitad dal pajais.

Uffanza e giuventetgna passentà per part en Svizra

Bhumibol Adulyadej è naschì ils 5 da december 1927 sco terz e pli giuven uffant a Cambridge en ils Stadis Unids. Ses bab studegiava medischina a l’universitad da Harvard.

1928 è la famiglia returnada en Tailanda. In onn pli tard è alura ses bab mort. La mamma è paucs onns pli tard viagià cun ses uffants en Svizra a Losanna, nua ch’il futur retg ha fatg las scolas ed ha studegia pli tard a l’ETH a Losanna.

In mez dieu per ils Tais

Buhmibol è vegni curunà uffizialmain il 1950 sco retg da la Tailanda. El è alura sa sviluppà ad ina autoritad suprema ed il medem mument era el fitg popular tar la populaziun. Surtut en las regiuns ruralas dal pajais valeva il retg sco in mez dieu.

Successur daventa il prinzi ereditar Maha Vajiralongkorn

Il schef da la regenza tailandaisa Prayut Chan-O-Cha ha communitgà la gievgia ch’il prinzi Maha Vajiralongkorn da 64 onns succedia sin il tron. La regenza vegnia ad infurmar il parlament ch'il retg haja nominà il 1972 ses figl sco successur. A medem temp ha il general e schef da regenza proclamà in temp da cordoli d'in onn.

RR novitads 14:00

Dapli da Exteriuravrir la Landingpage

Nach links scrollen Nach rechts scrollen