Il schef da Samsung ha annunzià sia demissiun

En vista ad ina crisa senza exempel saja uras per ina entschatta nova cun ina nova direcziun. Quai ha communitgà il schef dal concern da tecnologia sidcorean a Seoul, Kwon Oh Hyun.

Kwon Oh Hyun. Bild in Lightbox öffnen.

Legenda da maletgs: Kwon Oh Hyun sa retira surprendentamain sco schef da Samsung. Keystone

Samsung è il pli grond producent da smartphones dal mund. Il concern è responsabel per in tschintgavel da l’entir product naziunal brut da la Corea dal Sid.

Kwon Oh Hyun

L'um da 64 onns valeva sco numer dus da Samsung. Ins quintava che Kwon surpiglia ina rolla anc pli gronda. Sin cura che Kwon Oh Hyun dat giu ses post n'è anc betg enconuschent. Era tar pussaivels successurs vegn fatg naginas indicaziuns. Kwon lavura dapi 32 onns per Samsung ed è dapi tschintg onns a la testa dal concern da tecnologia.

Affera da corrupziun

Ina dretgira aveva sentenzià l’ertavel da l’imperi da Samsung, Lee Jae Yong, a tschintg onns praschun. Quai tranter auter pervi da corrupziun. Actualmain marscha in process d'appellaziun. Il cas stat en connex cun l’affera da corrupziun enturn l’anteriura presidenta da la Corea dal Sid, Park Geun Hye.

Ils investigaders accusan Samsung d'avair pajà grondas summas ad interpresas e fundaziuns da l'amia da Park – Choi Soon Sil - sco era a sia parentella per survegnir sustegn politic tar la fusiun da dus concerns. Lee ha snegà las reproschas da corrupziun.

RR novitads 06:00