Siglir tar il cuntegn

Exteriur Il scrivent Henning Mankell è mort

L'autur da crimis svedais saja mort en la vegliadetgna da 67 onns en sia chasa a Göteborg, communitgescha sia chasa editura. Mankell è mort en consequenza da cancer. El è cunzunt vegnì enconuschent pervi da ses crimis da l'investigader Kurt Wallander.

L'autur da crimis Henning Mankell
Legenda: L'autur svedais ha creà la figura dal cumissari Kurt Wallander. keystone

L'autur ha vendì sin l’entir mund passa 40 milliuns exemplars da crimis da Kurt Wallander, sulet en l’intschess tudestg 15 milliuns, quai ha ditg Christina Knecht da sia chasa editura Hanser. Cun blers da quels crimis è era vegnì fatg films. L’autur n’ha dentant betg mo scrit crimis, mabain er pliras serias per la televisiun svedaisa ed er producì tocs da teater.

Cun ses erox Wallander na fiss Mankell betg mo vegnì perina

Per la figura dal cumissari n'aveva Mankell nagina gronda simpatia. Sco il scrivent ha ditg pliras giadas, na fissan els dus betg stads propi amis en vita reala. Sulet l’amur tar la musica ed il stil da lavur calvinistic partevan els, ha Mankell accentuà. Uschiglio eran els detg differents.

Il 2013 è vegni diagnostitgà in tumor malign tar Mankell. L'entschatta dal 2014 ha el fatg public ch'el haja cancer e davent da lura ha el adina puspè scrit en ina columna en ina gasetta svedaisa dal decurs da sia malsogna.

RR novitads 14:00