Il president american Donald Trump pretenda ch’il parlament approvia 5,7 milliardas dollars per construir il mir al cunfin cun il Mexico. Uschiglio refusia el da suttascriver il budget e lura smanatschass in lung Shutdown. La chombra dals represchentants aveva approvà ils daners. En il Senat n'ha la dumonda dentant chattà nagina maioritad, gnanc per insumma votar davart questa project.
Ils democrats vulan numnadamain conceder a Donald Trump maximalmain 1,6 milliardas dollars. Quels daners dentant betg per in mir, mabain per autras mesiras da proteger il cunfin.
Pertutgads èn var 800'000 emploiads
Il senat e la chombra dals represchentants avessan stuì acceptar la deliberaziun d'ina bilantscha transitorica. Il president american avess cun sia suttascripziun stuì metter en vigur la proposta. En il senat tschentan actualmain 51 senaturs da Trump. Per la deliberaziun dovri denant la vusch da 60 fin 100 senaturs.
Dal uschenumnà «Shutdon» èn eventual dapli che 800'000 emploiads pertutgads. Els ston quintar cun vacanzas sfurzadas u lavurar senza paja. Probabel vegnan var 380'000 emploiads da la regenza a stuair far davent da sonda vacanzas sfurzadas. Var 420'000 emploiads che fan lavur indispensabla, ston lavurar senza paja. Quai pertutga la polizia, survegliaders da praschuns ed emploiads da l'aviatica.
RR novitads 06:00