Il status da Jerusalem è dispitaivel

Ils Stadis Unids vegnan probablamain a renconuscher Jerusalem sco chapitala dal stadi Israel. Plinavant vegnia il president american Trump ad instradar la dischlocaziun da l'ambassada americana da Tel Aviv a Jerusalem.

Jerusalem. Bild in Lightbox öffnen.

Legenda da maletgs: La Palestina e l'Arabia Saudita respundan l'intent cun «consequenzas privlusas». Keystone

La decisiun definitiva vegn Trump a dar enconuschent en il decurs da la mesemna. Quai saja dentant betg ina predecisiun per il status final da Jerusalem ubain per autras dumondas dispitaivlas tranter l'Israel e la Palestina, rapportan pliras agenturas da novitads sa referind sin indicaziuns ord la chasa alva.

In represchentant da la regenza argumentescha l'intent cun «la realitad istorica» e cun «la realitad moderna». Istoricamain saja Jerusalem il center da la cardientscha gidieua ed actualmain saja la citad la sedia da la regenza israelita. Quests arguments na vegnan però betg a persvader ils palestinais ed ils pajais arabs.

Sursiglir cuntegn supplementar

Jerusalem

Il status da Jerusalem è dispitaivel. Per Israel è Jerusalem la chapitala. Ils palestinais vulan dentant Tel Aviv sco futura chapitala dal pajais. Bleras ambassadas, tranter auter er l'ambassada svizra sa chattan a Tel Aviv.

Il mardi ha il president american infurmà il president da la Palestina, il retg da la Jordania ed il schef dal stadi da la Egipta davart ses intents. La Palestina e la Jordania han smanatschà cun «consequenzas privlusas». La Russia sustegna la Palestina e l'Arabia Saudita ha declerà l'intent sco provocaziun envers ils muslims. Il president da la Tirchia finiss la relaziun diplomatica cun l'Israel en cas che Jerusalem vegniss renconuschì sco chapitala.

Gia en sia candidatura aveva Trump empermess il spustament da l'ambassada.

RR novitads 06:00