Siglir tar il cuntegn

Header

cuntegn

Il WEF virtual Guterres crititgescha che la solidaritad globala manchia

En sasez avess cumenzà il glindesdi il Forum mundial d’economia a Tavau. Pervi da la varianta omicron datti dentant be in pèr occurrenzas virtualas e pleds.

Il secretari general da l’ONU Antonio Guterres ha manegià en ses pled – che senza cuntanscher da reducir inegualitads, restia il svilup economic per tut ils umans en tut ils pajais engrevgià. Ils dus davos onns hajan mussà che la via ord la pandemia funcziuneschia sulet cun procurar che nagin pajais restia enavos.

Perquai ha Antonio Guterres appellà da reparter ils vaccins cunter Covid-19 a moda pli gista en il mund. En pajais pli ritgs sajan las ratas da vaccinaziun set giadas pli autas ch’en stadis africans.

Xi per sforzs cuminaivels

Per stabilisar la conjunctura globala propona il president chinais Xi Jinping da collavurar pli intensiv sin livel internaziunal. I haja num da procurar en temps da la pandemia che l'economia globala na vegnia betg puspè en ina flaivlezza, ha Xi ditg tar la conferenza online «Tavau agenda».

Il medem mument ha il president chinais avertì, sche pajais industrials giajan sin ils frains u fetschian perfin ina vieuta – lura haja quai consequenzas negativas per la stabilitad economica e finanziala sin l'entir mund. E pajais en svilup portian la gronda part dals effects negativs.

En il rom da la «Tavau agenda» duain ils proxims dis er ils schefs da regenza da l’Israel, dal Giapun e da la Germania far in pled al WEF virtual.

Il Telesguard aveva rapportà la fin da december:

video
WEF vegn spustà sin la stad
Or da Telesguard dals 21.12.2021.
laschar ir. Durada: 3 minutas 30 Secundas.

RTR novitads 06:00

Artitgels legids il pli savens

Scrollar a sanestra Scrollar a dretga