Siglir tar il cuntegn
Inhalt

Exteriur Ils mustgins cun il virus Zika han cuntanschì ils Stadis Unids

Quai ch'ils experts da sanadad han temì dapi lung temp è ussa realitad: Er en ils Stadis Unids da l'America èn pliras persunas s'infectadas cun ils virus Zika entras murdias da mustgins. Avant eran ils carstgauns s'infectads en ils Stadis Unids sulet suenter viadis en pajais cun il virus Zika.

massa mustgins
Legenda: Trais umens ed ina dunna èn s'infectads a Miami (Florida) cun il virus. Keystone

Per l'emprima giada è sa cumprovà en ils Stadis Unids che mustgins han transmess il virus Zika. A Miami èn trais umens ed ina dunna vegnids murdids da mustgins ed uschia s'infectads, quai ha ditg il guvernatur dal stadi federal Florida. Avant eran ils carstgauns s'infectads en ils Stadis Unids sulet suenter viadis en pajais cun il virus Zika u suenter avair gì sex cun in partenari infectà.

Franà la donaziun da sang

Ord tema ch'il virus s'extenda han dus districts da Miami franà per motivs da prevenziun las donaziuns da sang. Tenor las autoritads duai questa mesira valair enfin ch'i dat ina pussaivladad da testas tuttas emprovas da sang sin il virus u enfin ch'i dat ina nova tecnologia che po neutralisar il virus Zika.

Fin ussa era il virus sa derasà en spezial en l'America centrala e dal sid sco er en la Caribica, nua ch'el vegn transferì entras mustgins. Entant vali sco cumprovà ch'il virus effectuescha tar dunnas en speranza ch'il fetus po avair disformaziuns da la chavazza ed auters donns neurologics.

RR novitads 21:00