Ils stadis G7 dattan clers signals

Malgrà las smanatschas da la China vulan ils stadis G7 intervegnir en la dispita da territori en la Mar Sidchinaisa.

Ils participants da l'inscunter dals G7 Bild in Lightbox öffnen.

Legenda da maletgs: Ils participants da l'inscunter dals G7 Keystone

A chaschun da lur inscunter suprem en il Giapun han ils G7 pretendì ina schliaziun paschaivla en il conflict. La China stoppia sa tegnair vid il dretg internaziunal, ha i num en la communicaziun dals 7 pli gronds stadis industrials. I saja da respectar ina decisiun d'ina dretgira da cumpromiss internaziunala, che vegn spetgada ils proxims dis. Quella dastgass crudar ora a favur da las Filippinas, la Malaisia ed il Vietnam e cunter la China.

Las inslas en la Mar Sidchinaisa Avrir maletg en lightbox.

Legenda da maletgs: Las inslas en la Mar Sidchinaisa Keystone

Inslas artifizialas

En la Mar Sidchinaisa datti dispita tranter la China, las Filippinas, il Vietnam, la Malaisia, il Taiwan ed il Brunei per inslas nua ch'i vegn supponì da chattar ieli.
La Mar sidchinaisa vala ultra da quai sco via maritima strategicamain impurtanta sur la quala radund in terz da l'ieli da l'entir mund vegn transportà.

Er la Russia vegn sut squitsch

Er en il conflict en l'ost da l'Ucraina vulan ils stadis G7 intervegnir pli fitg. Els smanatschan a la Russia cun novas sancziuns sch'il pajais na sa participeschia betg ad ina schliaziun dal conflict. En il text d'explicaziun, sin il qual ils stadis G7 èn sa cunvegnids ad Ise-Shima en il Giapun, èsi scrit ch'ils G7 sajan pronts d'auzar ils custs per la Russia sche quai fetschia da basegn. Ils ultims dis avevi danovamain dà grevs cumbats tranter las truppas ucranaisas ed ils separatists sustegnids da la Russia.

RR novitads 6:00