La Svizra duai vinavant pudair diriger l'immigraziun da persunas da la Rumenia e la Bulgaria. Il Cussegl federal ha decidì da prolungar la clausula che prevesa che la Svizra po restrenscher l'immigraziun, sche la quota d'immigraziun è per 10% pli auta che la media dals davos trais onns.
La clausula è gia en vigur dapi il zercladur 2017 e pussibilitescha a la Svizra uschia da diriger l'immigraziun, malgrà la libra circulaziun da persunas che vala er per ils burgais da la Bulgaria e la Rumenia dapi il 2016.
Nizzegiar dapli potenzial indigen
La raschun per cuntinuar cun las restricziuns saja ch'ins veglia nizzegiar meglier il potenzial indigen. Adina dapli immigrants dals dus pajais lavurian en ils secturs cun ina quota da dischoccupaziun surproporziunala.
UE malcuntenta cun la decisiun
Sin dumonda da l'agentura da novitads svizra SDA è l'Uniun europeica malcuntenta cun questa decisiun dal Cussegl federal. La cumissiun deploreschia che la libra circulaziun da persunas davent dal zercladur 2018 na saja betg garantida. Quai cunzunt perquai che l'immigraziun en la Svizra saja en general sa reducida fitg.
RR novitads 20:00