Glindesdi hai dà in attentat tar las attracziuns turisticas Moschea Blaua e Hagia Sophia ad Istanbul. L’attentader ha envidà ina bumba datiers d’ina gruppa da turists. 10 morts e 15 blessads hai dà, otg da las unfrendas èn burgais da la Germania. L’attentader è da l’Arabia Saudita. El vegn suspectà d’esser in aderent dal Stadi Islamic.
Ils vegls èn disads las bumbas
Franz Caduff, oriund da Zernez, viva dapi 26 onns ad Istanbul. El venda maschinas da textil per ina firma Svizra. Per el n’è il mintgadi ad Istanbul betg sa mida. El n’ha era betg tema. El fida a las mesiras da segirtad. Quellas èn fitg strictas: sch’ins va per exempel a cumprar en, lura vegn ins controllà sco a l’eroport.
Las mesiras èn in resultat da l’istorgia da la Tirchia. Adina puspè hai dà conflicts, saja quai durant ils cumbats tranter ils Curds e l’armada tirca, ni ils scumbigls durant l’arrestaziun dal manader da la PKK Abdullah Öcalan. Oravant tut la generaziun veglia è disada explosiuns da bumbas. Quellas han gia tutgà durant ils onns 90 tar il mintgadi.
Turissem en Tirchia patescha da las attatgas
Ed era oz datti bleras tensiuns en la Tirchia. En il pajais vischinant da la Siria regia ina guerra civila, en il sid cumbatta l’armada tirca puspè la PKK. Ad Istanbul hai blers Sirians ed Arabs, perquai tema la populaziun attatgas dal SI.
In auter grond quità èn las consequenzas dal turissem. Il turissem è numnadamain fitg impurtant per la Tirchia. Blers vegnan dentant a ponderar bain, sch’els vulan en il futur far vacanzas là. Ussa admoneschan era ils uffizis da l’exteriur da la Svizra e da la Germania da far viadis en la Tirchia. Il privel d’attentats vala per l’entir pajais e betg mo per tschertas regiuns.