Siglir tar il cuntegn

Exteriur In dals attentaders d’Istanbul era para in Russ

Las autoritads tircas han tenor atgnas indicaziuns arrestà 13 suspectads or dal circul dal Stadi Islamic suenter l’attatga sin la plazza aviatica Atatürk ad Istanbul. Ils attentaders duain esser stads esters – in Russ da la regiun Dagestan, in Usbek ed in Kirgais.

Ils attentaders suicidals a l’eroport derivan tenor la regenza tirca da l’Usbekistan, dal Kirgistan e da Dagestan.
Legenda: Ils attentaders suicidals a l’eroport derivan tenor la regenza tirca da l’Usbekistan, dal Kirgistan e da Dagestan. Keystone

Ils attentaders d’Istanbul derivan para d’anteriuras republicas sovieticas. I duai sa tractar d’in burgais russ da la regiun Dagestan, d’in Kirgais e d’in Usbek, ha gì num da la regenza tirca e da l’agentura da novitads DHA.

Usbekistan, Kirgistan und Dagestan èn per la gronda part muslimics e tutgavan inagiada a l’Uniun sovietica. Blers extremists dal Caucasus e da l’Asia centrala èn sa colliads cun la milissa da terror Stadi Islamic en la Siria ed en l’Irac.

43 morts, bunamain 240 blessads

D’in’attatga sin l’eroport Atatürk ad Isanbul eran totalmain vegnidas mazzadas 43 persunas. Tranter ellas duain tenor la regenza tirca er sa chattar 19 persunas da l’exteriur. Betg inclus en il dumber èn ils trais attentaders da suicidi ch’èn medemamain morts. Bunamain 240 persunas èn vegnidas blessadas – 94 da quellas duain actualmain anc vegnir tractadas en ospitals.

A chaschun da razzias cunter la milissa da terror SI ad Istanbul èn 13 persunas suspectadas vegnidas arrestadas. Tranter quellas duain esser trais esters, uschia la regenza. En la citad Izmir en il vest da la Tirchia haja la polizia arrestà ulteriurs nov suspectads.

RR novitads 17:00