Siglir tar il cuntegn

Exteriur In grond adia a Fidel Castro

En la Cuba han numerus schefs da stadi e da regenza e tschientmillis d'aderents prendi cumià da l'anteriur president Fidel Castro. Uschia era plirs presidents da pajais sidamericans sco Nicolas Maduro da la Venezuela ed Evo Morales da la Bolivia, alura era Daniel Ortega da la Nicaragua.

Il president cuban Raul Castro ensemen cun ina gruppa da persunas
Legenda: Il president cuban Raul Castro sa drizza a la fulla sa radunada sin la plazza da la revoluziun. Reuters

Fidel saja mort, el saja però mort senza sconfitta, ha tranter auter ditg il president ecuadorian Rafael Correa tar la ceremonia principala. Sin la plazza da la revoluziun en la chapitala Havanna eran sa radunadas nundumbraivlas persunas che faschevan sgulatschar bandieras cubanas.

Parolas politicas

Dasper blers politichers da l’America dal sid e centrala è era il president sidafrican Jacob Zuma vegnì a Havanna per prender cumià da Castro. Ed el ha numnà quel in "internaziunalist ed anti-imperialist che haja adina cumbattì per ils flaivels".

Il davos viadi

Fidel Castro era mort venderdi passà en la vegliadetgna da 90 onns. Ils proxims dis vegn l’urna cun sia tschendra manada per l’insla enturn. La dumengia proxima è lura planisada la sepultura a Santiago de Cuba en il vest da l’insla.

RR novitads 06:00