Silvana Degonda, ina schurnalista dal magazin «Schweizer Illustrierte» è stada avant curt per 7 dis ad Aleppo – ina da las citads centralas en il nord da la Siria. Ensemen cun la Crusch Cotschna è ella sgulada da la Svizra enfin Beirut, e suenter cun l’auto enfin ad Aleppo. La dunna da 35 onns ha discurrì cun quatter differentas famiglias che vivan ad Aleppo. Mintgina haja sia atgna istorgia, di Degonda.
Ina dunna ha pers ses figl en la guerra; in mat ha lavurà en la mina ed ha pers in maun; ina famiglia ha pers sia abitaziun tras il terratrembel.
La guerra è bain a fin, ma il mintgadi da las radund 2,4 milliuns abitantas ed abitants dad Aleppo è anc adina problematic. Betg mo pervi da las consequenzas da la guerra, mabain era il terratrembel d'avant 3 onns. Bler saja propi total en paglia, di Degonda.
-
Bild 1 von 7. Gist en il cunturn dad Aleppo era il terratrembel fitg ferm ed ha causà bleras sbuvadas. Bildquelle: Silvana Degonda.
-
Bild 2 von 7. Bildquelle: Silvana Degonda.
-
Bild 3 von 7. Ina famiglia che viva ad Aleppo, n'ha betg avunda raps per cumprar in'entira buttiglia da gas per cuschinar. Els ston mintgadi guardar da vegnir ensemen cun ils raps per emplenir la buttiglia. Bildquelle: Silvana Degonda.
-
Bild 4 von 7. Bildquelle: Silvana Degonda.
-
Bild 5 von 7. Bildquelle: Silvana Degonda.
-
Bild 6 von 7. Dapertut paraids cun foras dals bumbardaments durant la guerra. Bildquelle: Silvana Degonda.
-
Bild 7 von 7. Per part èn bajetgs destruids cumplettamain. Bildquelle: Silvana Degonda.
Las persunas èn plain speranza
I saja impressiunant, co che la populaziun haja ussa puspè la motivaziun da bajegiar si lur patria, manegia la schurnalista Silvana Degonda. Ins vuless puspè turnar en la normalitad, era scha quai n'è betg uschè simpel e dura anc in pèr onns. Il problem è che las resursas n'èn strusch avant maun, e bleras persunas han bandunà Aleppo.
Quai ch'è era in grond problem, èn las bancas. Ins na po betg simplamain ir en ina banca per raps.
La populaziun dad Aleppo survegn sustegn da differentas organisaziuns - sco per exempel la Crusch Cotschna. Quels gidan cun pitschens credits, cun mangiativas u bavrondas. Igl èn anc adina gruppas armadas sin las vias, perquai ch'i n'è anc betg propi russaivel u segir. Era in onn suenter la guerra è la situaziun lunsch davent d'ina normalitad.