Siglir tar il cuntegn
Inhalt

Exteriur Ina bloccada sco chasti collectiv

Organisaziuns d'agid han supplitgà la coaliziun militara, manada da l'Arabia Saudita, d'abolir la bloccada dal Jemen. Senza furniziuns d'agid sajan milliuns da persunas en privel da mort e fomaz.

Furniziun da nutriment tar l'eorport a Sanaa.
Legenda: La coaliziun militara duai abolir la bloccada e laschar entrar l'agid. Keystone

Avant 11 dis ha la coaliziun militara bloccà bunamain tut ils ports, eroports e las transiziuns da pajais a Jemen. Quai impedescha d'importar nutriment, benzin e medicaments ed autras provisiuns. La consequenza saja in chasti collectiv per la populaziun a Jemen.

En trais citads èn varga in milliun persunas periclitadas acut da la cholera . En las citads n'avevan els pervia da mancanza da benzin per ils vehichels da transport betg pli access ad aua da baiver, uschia la Crusch Cotschna internaziunala.

Avrir las vias per l'agid

La reavertura dals ports ed eroports ad Aden pervia da smanatschas da l'ONU saja bain in progress. Tuttina saja uschia betg pussibel per las organisaziuns da cuntentar ils basegns da l'entir pajais. Numnadamain dovran pli che 20 milliuns agid e set milliuns èn curt avant la fomaz.

Las organisaziuns supplitgeschan dad avrir tut ils ports ed eroports per chargia umanitara e commerziala. Er ils aviuns a Sanaa hajan puspè da pudair sgular, per che gidanters possian vegnir spertamain en il pajais.

Motiv per la bloccada

Bloccadas eran las vias vegnidas perquai che l'Arabia Saudita aveva accusà l'Iran dad esser responsabel per in'attatga cun ina racheta dals rebels da Huthi dal Jemen.

RR novitads 15:00