Siglir tar il cuntegn

Exteriur Ina racheta dal tip Buk ha tutgà l’aviun MH17

Ussa èsi definitiv, l'aviun MH17 da la Malaysia Airlines è vegnì sajettà giu l’onn passà sur l’Ucraina da l’Ost dad ina racheta dal tip Buk.

Ina part d'in aviun, davostiers persunas che portan ina purtantina.
Legenda: Il fanadur 2014 era l’aviun MH17 crudà giu en l’Ucraina da l’Ost. Keystone

Il Cussegl da segirezza ollandais ha communitgà quai sin basa da sias examinaziuns.

L’aviun MH17 saja crudà giu, perquai ch’il chau d’ina racheta saja explodì da la vart dretga dal cockpit, ha ditg il schef dal gremi.

Tgi è la culpa?

Da tge territori che la racheta è vegnida sajettada, n'ha il gremi però betg communitgà. La dumonda da la culpa vegn numnadamain tractada en il rom d’inquisiziuns penalas. Parts da l’Ucraina da l’Ost controlleschan ils separatists sustegnids da la Russia, e l’Ucraina e la Russia fan responsablas ina l'autra per la catastrofa.

Passa in onn dapi la disgrazia

L'aviun dal tip Boeing da la Malaysia Airlines era ils 17 da fanadur da viadi da Amsterdam en direcziun Malaysia, cura ch’el è crudà giu en la regiun Donbass. Tut las 298 persunas a bord èn mortas tar la crudada. Tenor il rapport han las persunas pers spertamain la schientscha, uschia ch'ellas n'han probablamain strusch sentì la crudada.

RR Novitads 14:00