Siglir tar il cuntegn

Exteriur Incendi da guaud en vischinanza da Berlin

Trais vitgs en il sid da Potsdam han stuì vegnir evacuads. La surfatscha che arda saja uschè gronda sco 400 plazzas da ballape.

Pmpiers cun auto da pumpiers en il guaud.
Legenda: En il sid da Potsdam arda il guaud. Keystone

50 kilometers en il sidvest da Berlin brischa il guaud. Enturn 500 persunas han stuì bandunar la gievgia saira lur chasas. Tenor las autoritads è il fieu per part mo 100 meters davent dals trais vitgs Frohnsdorf, Klausdorf e Tiefenbrunnen. Per entant na sajan dentant naginas chasas vegnidas donnegiadas. Tuttina saja la situaziun dramatica.

La surfatscha che arda, saja uschè gronda sco 400 plazzas da ballape. Radund 300 persunas èn en acziun per stizzar il fieu. Sin cura ch'ins possia stizzar il fieu n'han ils pumpiers anc betg pudì dir.

Las lavurs da stizzar vegnan engrevgiadas, damai ch'il fieu è sa derasà sin in territori, nua ch'i ha muniziun. I haja gia dà explosiuns. Pervi dal ferm fim han las autoritads intimà ils avdants da Potsdam da serrar las fanestras ed er da stizzar ventilaziuns e climatisaziuns.

RR novitads 06:00