- Dapi la bun'ura stattan en flommas dus magasins a Hamburt-Rothenburgsort.
- Ils pumpiers averteschan da privel entras gas e chemicalias en l'aria tar l'incendi.
- La populaziun vegn supplitgada da tegnair serrà fanestras ed ischs sco er da tschentar giu tut ils sistems da clima, hai gì num en in avertiment.
Videos d'abitantas ed abitants en las medias socialas mussan l'incendi ed in nivel nair. Sco il «Norddeutscher Rundfunk» (NDR) rapporta, tenor quai ch'ils pumpiers hajan ditg, saja l'incendi rut ora enturn las 04:30 sin in parcadi.
La citad da Hamburg è stada cuverta cun in nivel gross da fim, sco in pumpier ha declerà a las medias. Blessads n'haja dentant dà nagins.
Ils pumpiers han avertì dal fim, han supplitgà abitantas ed abitants da tegnair serrà fanestras ed ischa. Er ventilaziuns e sistems climatics duain ins tschentar giu. En in'avertiment da las autoritads hai gì num che la populaziun possia vegnir restrenschida entras ils gas e chemicalias en l'aria pervi da l'incendi.
Rothenburghorst giascha en l'ost dal center da Hamburg dasper la Elbe e cunfinescha tranter auter cun la «Hafencity». Co igl è vegnì tar l'incendi n'è anc betg cler. Er tge che saja sa chattà en ils dus magasins n'han ils pumpiers anc betg chattà or. Dentant sajan stads plirs containers da IBC sin il parcadi. Quels sajan schluppads e culads ora. En quels sajan stads liquids inflammabels.
Autoritads discurran da «privel extrem»
Da tge chemicalias ch'i sa tracta precis n'è anc betg cler. Tenor in rapport dal NDR sa tractia dad uschenumnà gas marsch u idrogen sulfuric. L'incendi ed il fim classifitgeschan las autoritads sco «extrem malsegir».
Acziun cumplitgada per pumpiers
I sa tractia d'in incendi extraordinarmain grev, ha declerà in pledader dals pumpiers al lieu. El parta dal fatg ch'ils pumpiers ch'èn al lieu cun 210 persunas, sajan probablamain anc l'entir di fatschentads cun las lavurs da stizzar. Pir suenter possia la polizia cumenzar las investigaziuns. Actualmain pon ins entrar la zona be cun mascras da protecziun respiratorica.
Il fieu ha gì consequenzas e per il traffic da trens. Tenor indicaziuns da la «Deutsche Bahn» è il traject tranter Hamburg e Büchen betg pussibel, perquai che l'incendi è directamain dasper ils binaris. trens da IC ed ICE crodan or l'entir di tranter Hamburg e Rostock.