En l’Australia èn il mardi passa 600 scolas stadas serradas pervi dals incendis da chagliom. Quai en la metropola da Sydney, ma er en ulteriuras parts dal stadi federativ New South Wales ch’è cunzunt pertutgà dals incendis. Cun quest pass vulan las autoritads sustegnair la lavur dals pumpiers.
Stadi d'urgenza levgescha lavur als pumpiers
Il glindesdi avevan las autoritads proclamà il stadi d’urgenza. Cunzunt per il mardi eran prognostitgadas novas chaliras e latiers ferms vents, quai che engrevgieschia las lavurs als pumpiers. Il stadi d'urgenza lubescha als pumpiers da mobilisar tut las resursas statalas e d'organisar evacuaziuns.
Almain trais persunas èn mortas en las flommas e radund 100 ulteriuras vegnidas blessadas, tranter quellas 20 pumpiers. Fin uss han ils incendis destruì ina surfatscha da bunamain 1 milliun hectaras. Quai correspunda ad in quart da la Svizra.
RR novitads 07:00