Pervi da grevs incendis da guaud han bunamain 1'000 persunas stuì bandunar lur chasas en il nord-vest da l'Italia. Pertutgà il pli ferm dals incendis saja la Val Susa en il Piemont cun ils lieus Mompantero, Venaus e Susa, rapporta l'agentura da novitads taliana ANSA. Er la notg sin glindesdi è la situaziun anc stada critica en questa regiun. Tranter auter han 200 persunas d'ina chasa d'attempads stuì vegnir evacuadas. Ils incendis furieschian gia dapi intginas emnas. I vegn supponì ch'i sa tracta d'incendiaments.
Tenor indicaziuns da l'organisaziun d'ambient taliana Verdi han incendis da guaud quest onn gia destruì 135'000 hectaras terren. Quai èn trais giadas uschè bler terren sco l'onn passà. La stad 2017 èn surtut il sid ed il center da l'Italia stads pertutgads d'incendis – quai pervi da las chalurs e la sitgira.
RR novitads 06:00