Pervi dals numerus incendis da guaud han las autoritads da la provinza canadaisa Alberta proclamà il stadi d’urgenza. Quai ha communitgà Danielle Smith, la scheffa da la regenza da la provinza via Twitter.
Entant hajan radund 25'000 persunas stuì bandunar lur chasas. Actualmain furieschian passa 100 incendis. Da quels sajan 30 ord controlla. Ils incendis da guaud vegnian probabel anc a sa derasar vinavant pervi da la chalira e la setgira, teman las autoritads. Fin uss hajan las flommas destruì almain 20 chasas ed auters bajetgs.
Er auas grondas
En il vest dal Canada regian actualmain temperaturas ordvart autas per la stagiun. Quellas na chaschunan betg mo incendis, mabain er inundaziuns. En la provinza da British Columbia èn pervi da l’aua da naiv plirs flums ids sur las rivas or.
