Ils fieus en il vest dals Stadis Unids periclitescha vinavant pliras 100'000 persunas. Sulettamain en il stadi Oregon sajan gia 40'000 persunas vegnidas evacuadas. Las autoritads appellà ad in mez milliun ulteriuras persunas da sa preparar sin in'evacuaziun pussibla.
Tenor la guvernatura dad Oregon, Kate Brown, sajan il incendis en il stadi federativ «senza exempel». Ina surfatscha da 4'000 kilometers quadrat saja en flommas. Quai è dapli che la surfatscha dal chantun Vad. Tenor rapports da medias cumbattan millis da pumpiers passa 40 incendis. Tozzels da persunas sajan anc sparidas.
Almain tschintg citads sajan gia vegnidas destruidas considerablamain. En be trais dis hajan las flommas devastà il dubel da la vegetaziun che brischia uschiglio en media en in entir onn, uschia Brown.
Incendis er en California
En il stadi California èn fin uss mortas 19 persunas. Bunamain 15'000 pumpiers cumbattian là 28 fieus gronds, han communitgà las autoritads. Sco ad Oregon èn er en la California millis chasas vegnidas devastadas.
