Il primminister australian, Scott Morrison ha renvià pretensiuns per dapli protecziun dal clima en ses pajais. Quai en vista als gronds incendis che furieschan il mument tras il pajais.
Nus na sa laschain betg en sin finamiras da clima betg ponderadas e dain betg si l'industria tradiziunala per che plazzas en l'Australia van a perder.
Morrison ha laschà valair ch'i saja necessari d'introducir dretgas mesiras cunter la midada dal clima, e quai sin tut ils livels. Dentant è el cleramain da l'avis ch'era finamiras per il clima pli rigurusas n'avessan gidà nagut cunter ls incendis che furieschan il mument en il pajais.
Plirs milliuns hectaras gia arsas
Dapi l'october sajan arsas gia plirs milliuns hectaras pervi da tschients incendis da guaud. Passa 1'000 chasas èn vegnidas destruidas. L'Australia patescha dapi dus fin trais onns d'ina setgira extraordinaria. La vegetaziun enorm sitga cumenza pia anc pli tgunsch ad arder. Quest'emna ha l'Australia gì ses pli chaud di dapi l'entschatta da las mesiraziuns. Mesemna è la media dal pajais stada tar 41,9°C.
Morrison sustegna gia daditg l'industria da charvun. Trais quarts da la producziun da charvun vegn exportada – quai per in volumen da 67 milliardas dollars australians mintg'onn.
RTR novitads 06:00