En Grezia èn entant tut ils incendis da guaud en il pajais sut controlla. Quai annunzian medias grecas. Pervia da la chalira cun temperaturas da fin 47 grads restia il privel per incendis da guaud però extrem aut, averteschan la protecziun civila e l'uffizi da l'aura. Il privel na saja anc betg superà, uschia in pledader dals pumpiers. Dapi ils 12 da fanadur èn ruts ora radund 500 fieus en l'entira Grezia. Las ultimas uras saja reussì als pumpiers ed als millis da gidanters da salvar da las flommas il vitg da vacanzas popular Gennadi sin l'insla Rhodos.
Er en Sicilia brischi
- In'unda da chalira ha tutgà l'entira regiun da la Mar Mediterrana. Er en l'Algeria, la Tirchia e la Sicilia datti incendis
- A Rhodos èn 150 kilometers quadrats brischads, tge che correspunda circa a la surfatscha dal Principadi Liechtenstein
- Plinavant hai dà ferms urizis en l'Italia dal Nord
Mardi notg hai cumenzà a brischar en la Sicilia. Plirs guauds èn pertutgads, cunzunt en il nord da l'insla. Il port aviatic ha stuì vegnir serrà temporarmain durant la bun'ura.
Tenor ils pumpiers èn ils fieus sut controlla sin l'insla Sicilia. L'emettur da televisiun «Rai» rapporta che 1'500 persunas han stuì vegnir evacuadas. A Palermo ed en las regiuns èn ils pumpiers tenor atgnas indicaziuns en acziun cun 30 teams per stizzar ils fieus.
En parts da l'Italia dal Nord hai plinavant dà grevas malauras. Cunzunt la metropola da Milaun e vastas parts da la Lumbardia èn stadas pertutgadas. Ferms suffels d'orcan, granella e plievgia han chaschunà gronds donns. Plantas èn cupitgadas – quai ch'ha bloccà vias e donnegià autos e chasas. Ina matta da 16 onns è morta perquai ch'ella è vegnida tutgada d'ina planta.
Mintga dieschavel hotel a Rhodos è donnegià
Er en Grezia resta il privel d'incendis auts, di la protecziun civila da la Grezia. Sustegn datti da pumpiers da plirs stadis da l'UE, ed er l'Egipta e la Tirchia ha tramess aviuns e helicopters per gidar da stizzar ils incendis sin las inslas grecas.
Las pli bleras chasadas ed ils pli blers hotels donnegiads èn en la regiun dal sid da Lindos. Reporters e reportras al lieu teman ch'ils incendis pudessian puspè vegnir pli ferms e metter en privel umans e chasas. Millis persunas han stuì vegnir evacuadas da Rhodos.
A Corfu è la situaziun sut controlla
Ils radund 1000 turists e turistas han per part pudì returnar en lur hotels. Ils pumpiers hajan survegnì sut controlla ils incendis, di l'emettur da televisiun regiunal ERA-Korfu. Er tar la citad Peloponnes han ins pudì limitar ils fieus. A Euböa datti cunzunt incendis datiers da la pitschna citad Karystos, che n'èn betg sut controlla.
Temperaturas enturn 45 grads
En l'entira Grezia èn las temperaturas per part enturn 45 grads. Pir la gievgia duai puspè dar temperaturas pli miaivlas (35 grads). Cun gliez fissi lura stada la pli lunga unda da chalira en Grezia, passa duas emnas cun temperaturas da passa 40 grads), di il servetsch meteorologic da la Grezia.
Sgols per persunas da la Svizra
L'emprim sgol per turistas e turists svizzers hai dà mardi la notg davent da Rhodos. In'ulteriur aviun cun 30 plazs dapli per passagiers e passagieras è gia ì il glindesdi.
Tenor il Departament federal per affars da l'exteriur datti quels dus numers da telefon per survegnir agid en Grezia: +30 210 368 12 59 e +30 210 368 13 50.
Incendis catastrofals en l'Algeria
Er l'Algeria è pertutgada da las chaliras e d'incendis. I haja dà 34 victimas dals incendis fin ussa. I brischa cunzunt en la regiun Beni Ksila. Er en la Tunesia e la Tirchia datti incendis.
