Siglir tar il cuntegn

Header

cuntegn

Exteriur Incendis en la Frantscha dal Sid ed en il Portugal

En il sid da l'Europa perlicliteschan incendis plirs lieus. Sin l'insla portugaisa Madeira èn mortas trais persunas pervi dals incendis.

En la Frantscha dal Sid han incendis da guaud destruì radund 2’700 hectaras terren. Quai correspunda ad ina surfatscha da la citad da Lucerna. Las flommas s’avischinian a la citad da Marseille. Quai rapportan las autoritads localas.

La situaziun na saja betg pli sut controlla. En tut sajan 1’500 pumpiers en acziun. Milli persunas sajan gia vegnidas evacuadas. Fin 8’000 ulteriuras persunas sajan periclitadas dals incendis.

Grevs incendis sin l'insla portugaisa Madeira

Er en il Portugal han ils pumpiers da cumbatter cunter las flommas. Sin l'insla Madeira èn trais persunas mortas en las flommas. Ellas sajan mortas en lur abitaziun datiers dal quartier istoric da Funchal, il center da la regiun. Medias localas rapportan ultra da quai era da duas persunas grevamain blessadas.

Pervi dals fieus che sa derasan èn radund milli persunas vegnidas evacuadas, tranter questas era blers turists ord hotels. Quai han inditgà las autoritads. Il Portugal è pertutgà dapi venderdi da grevs incendis da guaud, en spezial il nord dal pajais. En l'entir pajais èn radund 3'000 pumpiers en acziun.

RR novitads 11:00

Artitgels legids il pli savens