Il president american ha nizzegià las festivitads al di d'independenza per ina demonstraziun militara. En ses pled al di da la festa naziunala ha Donald Trump ludà la fermezza dals Stadis Unids.
La naziun saja uschè ferma sco anc mai, ha el ditg durant in act festiv a Washington. Per ils Americans saja tut pussaivel. Sco exempel ha il president numnà la tschentada sin la glina avant 50 onns. Bainprest vegnian ils Americans er a trair si ina bandiera sin il Mars, ha empermess Trump. Plinavant ha el er ludà las truppas americanas.
Critica envers festa pumpusa
Critichers renfatschan a Trump d'avair politisà e militarisà las festivitads. A l'entschatta da las festivitads ha il president american laschà sgular ina Boeing 757 sur Washington or. Silsuenter hai da plirs sursgols da helicopters e aviuns da cumbat.
Durant ch'ils aderents dal president han beneventà la demonstraziun da pussanza, renfatschan adversaris a Trump da sfarlattar daners da taglia. Plinavant han activists crititgà che Trump mettia sia atgna persuna en il focus da la festa naziunala.
RR novitads 06:00