Siglir tar il cuntegn

Header

cuntegn

Inschignier a Pachuca, Mexico Beni Cajacob: «Il virus è in grev gieu per la regenza»

Era dapi bun dus mais è era la vita en il Mexico franada. Scolas, butias ed ustarias èn serradas. Tuttina, paralisar dal tut la vita da las Mexicanas e dals Mexicans saja impussibel, quai di il Sursilvan Beni Cajacob che viva e lavura en la citad mexicana da Pachuca.

Pitschnas butias e stans sajan anc averts sin las vias da Pachuca, di Beni Cajacob che viva en la citad che giascha en il nord da Mexico City. I saja er strusch pussaivel da serrar quels. Pertge bunamain 60 milliuns dals mexicans hajan ina lavur informala u lavurien nair, sch'ins serrassia tut quai lura giessan bleras fatschentas a frusta e la glieud d'avess betg da mangiar. Uschia declera l'inschegnier che viva cun interrupziuns adina puspè a Mexico il dilemma. Vitiers vegnia che la regenza na sappi betg sustegnair l'economia uschè bain auter pajais fetschian quai. Perquai saja far restricziuns «in grev gieu per la regenza».

«Regenza drizza la situaziun in zic sco ella vul»

Sustegn da la regenza per las persunas e fatschentas senza lavur dettia pauc. Cun il disequiliber economic creschia er la criminalitad en il Mexico. Er ils cartels sajan gia sa maschedads en la crisa e repartien pachets cun victualias a glieud en paupradad. Uschia veglian ils cartels far propaganda e rinforzar lur basa.

Actualmain dubra Mexico enturn 45'000 cas confermads da corona, quai sin bunamain 130 milliuns abitants. Per congualar: la Svizra cun stgars otg milliuns abitants dumbra passa 30'000 infectads. Ch'i dettia be uschè pauc infectads dubeta l'um da 52 onns ch'è creschì si a Sumvitg.

Lavurar sco enfin qua

Per l'inschignier che lavura en in concern d'energia internaziunal va ses mintgadi da lavur vinavant sumegliant sco avant la crisa. Els lavurian tuttina bler sco avant, simplamain cun resguardar las reglas d'igiena e distanza ed er cun mascra.

audio
Corona enturn il mund: Beni Cajacob en il Mexico
ord Actualitad dals 18.05.2020. Maletg: MAD
laschar ir. Durada: 4 minutas 30 Secundas.

RTR actualitad 08:00

Artitgels legids il pli savens