La NATO avra la porta per l’Ucraina. Suenter l’invasiun russa duai il pajais aderir a l’allianza militara. Sin quai èn ils stadis da la NATO da principi sa cunvegnids. In invit formal per prender si l’Ucraina duaja lura dar cura che las cundiziuns sajan ademplidas e cura ch’ils alliads sajan perina, ha ditg il secretari general da la NATO, Jens Stoltenberg a l’inscunter suprem a Vilnius en la Lituania. Il president ucranais Wolodimir Selenski vul in chalender concret per l’adesiun da l’Ucraina. Quel na datti però betg.
Svezia po bainbaud entrar en la NATO
La Svezia po bainbaud daventar commembra da l'allianza militara NATO. La Tirchia ha dà si sia resistenza cunter l'adesiun dal pajais scandinav.
Il president tirc Recep Tayyip Erdogan ed il primminister svedais Ulf Kristersson èn sa cunvegnids a plirs pass tar l'inscunter da la NATO a Vilnius. Erdogan haja dà il consentiment da suttametter uschè spert sco pussaivel l'adesiun da la Svezia al parlament tirc, ha confermà il secretari general da la NATO, Jens Stoltenberg, avant las medias. La decisiun vala sco chaussa formala.
Il schef da la regenza svedaisa ha punctuà che quai saja in bun di per ses pajais. La dispita davart l'adesiun da la Svezia a la NATO ha procurà per grondas tensiuns avant l'inscunter. Curt avant l'inscunter aveva Erdogan anc fatg dependent sia decisiun dal process d'adesiun da la Tirchia a l'Uniun europeica. Il levgiament che Erdogan ha tuttina dà si sia bloccada è perquai stà grond. La presidenta da la cumissiun da l'UE, Ursula Von der Leyen, ha discurrì dad in pass istoric via Twitter.
Or da l'archiv:
