Siglir tar il cuntegn

Header

cuntegn

Inscunter China – USA Biden e Xi condemnan smanatschas cun armas atomaras

Il president american Joe Biden e ses collega d'uffizi chinais Xi Jinping èn s'inscuntrads oz, glindesdi, avant che l'inscunter dals stadis G20 cumenza en l'Indonesia.

I sa tracta da l'emprim inscunter direct dals dus politichers, dapi che Biden ha supriglià ses uffizi avant dus onns. Xi ha declerà avant l'inscunter, ch'el saja pront per in discurs profund ed avert. Biden ha punctuà che la concurrenza dals dus pajais na dastgia betg manar ad in condlict.

Omadus condemnan smanatschas cun armas atomaras

A l'inscunter han il president american ed er il schef da partida Xi Jinping condemnà las smanatschas russas cun armas atomaras en l'Ucraina. Omaduas varts hajan accentuà ch'ina guerra atomara na possia mai vegnir manada, quai ha communitgà la Chasa alva a Washington suenter l'inscunter.

audio
Biden: «Da smanatschar cun armas atomaras n'è absolutamain betg acceptabel»
ord RTR Audio dals 14.11.2022.
laschar ir. Durada: 8 Secundas.

Biden ha pledentà violaziuns cunter dretgs umans

A l'inscunter a Bali saja Joe Biden er s'exprimì davart ses quitads pertutgant violaziuns dals dretgs umans en China. Biden haja pledentà l'agir da la regenza en la regiun dal nordvest da la China, en la regiun Xinjiang, a Tibet ed a Hongkong. El haja er discurrì davart cas da burgais americans che sajan arrestads per sbagl en la Chinda u na possian betg bandunar la republica.

A HongKong blochescha la regenza chinaisa cun mesiras da segirezza il moviment da l'opposiziun democratica. Plinavant renfatschan gruppas per ils dretgs umans a las autoritads chinaisas ch'i supprimian la minoritad dals Uigurs a Xinjiang sco er ils Tibetans.

RTR novitads 15:00

Artitgels legids il pli savens

Scrollar a sanestra Scrollar a dretga