L'emprim inscunter suprem dal clima en l'Africa va damaun a fin cun suttascriver la uschenumnada «decleronza da Nairobi». Quest document duai fixar impurtantas finamiras per la giustia en il cumbat encunter il stgaudament dal clima. Quai en vista a la conferenza mundiala dal clima il november a Dubai.
Ils participants vulan admonir las naziuns industrialas a lur obligaziuns finanzialas tar projects da clima en il sid. Africa contribueschia mo a radund 4% dal stgaudament dal clima, saja dentant pertutgà fitg.
A Nairobi en la Kenia ha gì lieu l'emprim inscunter african davart il clima. Cun avrir la conferenza ha il president da la Kenia, Wiliam Ruto discurrì e numnà il cumbat cunter la stgaudada globala ina schanza unica per il continent d'attrair investiziuns da milliardas.
Ditg hajan ils stadis africans vis la crisa dal clima sulet sco problem. Uss saja temp da contemplar la chaussa da l'autra vart, ha declerà Ruto. Il continent possia daventar ina plazza industriala verda dal mund. Tranter auter saja l'Africa impurtanta per las energias regenerablas pervia da sias resursas mineralas, la sfida saja da tegnair la producziun da valuta avant lieu e betg mo exportar las resursas senza gudogn.
