Suenter l’inscunter dals G7 en il Giapun è la China vilentada. In pledader da la regenza ha discurrì da disfamaziun e dad in’attatga sin la China. Ils G7 sa maschaidian en ils affars interns da la China. Las pli grondas naziuns economicas avevan tranter auter crititgà las smanatschas da guerra da la China cunter Taiwan. Peking vesa l’insla sco part da l’agen territori naziunal. Plinavant han ils G7 appellà a la China da persvader la Russia da terminar la guerra en l’Ucraina.
Decleraziuns dals G7
Tar l'inscunter da las pli grondas naziuns industrialas G7 hai dà decleraziuns communablas ed impurtantas decisiuns:
- Sustegn per l'Ucraina: «Nus pigliain mesiras concretas per sustegnair l'Ucraina uschè ditg sco necessari en vista da la guerra d'attatga illegala da la Russia», uschia ina decleraziun. Ils custs da la guerra per la Russia vulan ils pajais augmentar, e perquai rinforzar las sancziuns cunter ella.
- Traffic electric: Ils G7 piglian duas finamiras, per l'ina avair 50% autos senza emissiuns il 2030, per l'autra vender il 2035 mo pli autos cun motor electric.
- Intelligenza artifiziala: Il svilup da la tecnologia duai vegnir drizzà suenter valurs democraticas: fairness, transparenza e segirtad, tranter auter. Ed ella duai resguardar ils dretgs umans ed ils dretgs sin ina sfera privata.
- Biden ha approvà da trenar pilots ucranais sin aviuns da cumbat F-16. Uschia ha el, tenor l'agentura da novitads DPA, avert la via per furnir aviuns da cumbat a l'Ucraina. Quai è fin uss adina vegnì refusà dals Stadis Unids.
- China: Investiziuns da China en interpresas dals G7 duain vegnir controlladas meglier. E la dependenza da l'economia chinaisa duai vegnir reducida. Ina separaziun economica da la China na saja dentant betg planisada.
- Discharmament nuclear: Per l'emprima giada han ils G7 declerà da vulair discharmar nuclearamain. En l'uschenumnada «visiun da Hiroshima» stat scrit che la «finamira d'in mund senza armas nuclearas» sto vegnir cuntanschida cun mesiras «realisticas, pragmaticas e responsablas».
Dals resultats da quest inscunter dals G7 a Hiroshima èn tschertas gruppas sco Oxfam dentant trumpadas: «Ils G7 pon dar ora pliras milliardas per far guerra. Per gidar tar crisas umanitaras, na pon els gnanc dar ora la mesadad da quai che l'ONU basegna». Quella aveva ditg ch'i dovria 55 milliardas per quai, ils G7 mettan dentant a disposiziun be 21 milliardas francs. Auters puncts da critica èn ch'i na dat betg avunda daners per pajais paupers da proteger il clima.
