Siglir tar il cuntegn

Header

La maisa da contractivas cun ils commembers da l'inscunter.
Legenda: 12 uras discurs, ma nagina soluziun per preschentar. Ils 17 da mars duajan ils detagls dal pachet suandar. Keystone
cuntegn

Exteriur Inscunter suprem da fugitivas: ina basa, ma nagin avanzament

A l’inscunter suprem dals presidents e schefs da stadi da l’UE a Brüssel è vegnì decis ina basa per schliar la crisa da fugitivas. Detagls duajan dentant pir vegnids discutads al proxim inscunter. Enfin lura duai il president dal cussegl da l’UE Donald Tusk discutar sur da soluziuns cun la Tirchia.

Ils schefs da stadis e regenza han proponì quest proceder a Tusk suenter discurs da quasi 12 uras. Sco termin per tractar in pachet è vegnì numnà ils 17 da mars.

La Tirchia aveva gia avant l’inscunter proponì da reprender tut ils fugitivas e franar dal tut l'unda da fugitivas vers la Grezia. Sco cuntramesira duajan las Tirchas survegnir libertad da viadi en l'Europa e la Tirchia daners supplementars per il provediment dals fugitivas.

Merkel discurra d’in «avanzament»

Ensemen cun il primminister tirc Ahment Davutoglu ed il schef da la cumissiun da l’UE Jean-Claude Juncker ha ditg Donald Tusk ch’ils dis da la migraziun illegala en l’Europa sajan passads.

La chanzeliera tudestga Angela Merkel ha taxà las propostas tircas sco avanzament, en il cas ch’ellas vegnian realisadas. Uschia possia la chadaina da migraziun illegala vegnir interrutta. Merkel ha defendì la spustada dal termin, las regenzas europeicas dovrian quest temp per s’accordar cun lur parlaments.

Serrada da ruta dal Balcan è lontana

En la decleraziun finala da l’inscunter da l’UE èsi plinavant vegnì ditg che l’agid finanzial per la Tirchia da trais milliardas euros duajan vegnir pajads sveltamain.

Ultra da quai è vegnida stritgada la formulaziun ord la decleraziun finala, che la ruta dal Balcan saja serrada per migrantas. Tenor diplomatas da l’UE avevan Merkel e Juncker fatg opposiziun cunter questa construcziun.

A l’inscunter èsi vegnì constatà che l’unda da fugitivas via il Balcan saja sa calmada. La decleraziun finala pretenda da realisar tuttas mesiras per reconstituir il territori da Schengen senza controllas fin la fin dal 2016.

RR novitads 06:00

sda/alb

Artitgels legì il pli savens

Nach links scrollen Nach rechts scrollen