Siglir tar il cuntegn

Header

Navigaziun

Purtret da 10 dals impurtants als G20.
Legenda: Da sanester a dretg: Giuseppe Conte, Theresa May, Mark Rutte, Emmanuel Macron, Pedro Sanchez, Angela Merkel, Donald Tusk, Jair Bolsonaro, Mauricio Macri e Jean-Claude Juncker. Keystone
cuntegn

Inscunter suprem dals G20 Stadis sa cunvegnan a decleraziun finala

Ils schefs da stadi da las naziuns industrialas las pli impurtantas dal mund han tuttina anc dumagnà da sa cunvegnir ad ina decleraziun finala per lur inscunter ad Osaka en il Giapun. Quai ha declerà la chanceliera tudestga Angela Merkel.

Uschia acceptian ils Stadis Unids ch'ils auters stadis veglian rinforzar lur stentas per la protecziun dal clima. Ils Stadis Unids han fin la fin betg vulì menziunar ils temas protecziun dal clima e migraziun en la decleraziun.

I vegnia a dar in text sumegliant sco tar l'ultim inscunter da G20 en Argentina, ha declerà Merkel ad Osaka. Sco a Buenos Aires vegnian 19 fin 20 pajais a renconuscher la cunvegna da clima da Paris. Ils Stadis Unids restan dentant tar lur decisiun da refusar la cunvegna.

USA e China reprender discurs

En lur dispita commerziala èn ils Stadis Unids e la China sa cunvegnids da puspè reprender las contractivas. Quai ha communitgà il president american Donald Trump suenter ses inscunter cun il schef dal stadi chinais Xi Jinping a l'ur da l'inscunter.

Sco la vart chinaisa rapporta hajan ils Stadis Unids empermess da betg vulair incassar novs dazis da chasti sin imports da la China. Plinavant vul Trump puspè lubir furniziuns americanas al concern da telecommunicaziun chinais Huawai.

RR novitads 09:00