Tge capita? Meta planisescha da duvrar a partir dals 27 da matg 2025 cuntegns publics da persunas europeicas sin Facebook, Instagram e Whatsapp per sviluppar vinavant ses assistent d’intelligenza artifiziala, Meta AI.
Tge datas vegnan rimnadas? Registrads vegnan be cuntegns publics da creschids sin las plattafurmas da Meta: posts publics, fotografias, legendas da maletgs, commentaris, recensiuns ed era messadis directs a Meta AI. Tenor Meta na vegnan ni chats privats sin Whatsapp ni cuntegns da minorens utilisads.
Per tge intent vegnan questas datas utilisadas? Tenor Meta duain las datas gidar a meglierar l’intelligenza artifiziala per las linguas, las culturas e las circumstanzas specificas da l’Europa. L’interpresa vul uschia augmentar la relevanza da ses servetschs dad IA en l’Europa.
Co pon ins far opposiziun? Utilisadras ed utilisaders pon far opposiziun cun in formular online. Per quai basta d’inditgar l’adressa d’emagl ch'è colliada cun il conto. Ina giustificaziun n’è betg necessaria. Opposiziuns fatgas gia l’onn passà restan vinavant validas.
Nua chatt’ins ils formulars correspundents? Ils formulars èn accessibels directamain sin las paginas da web da Meta, sco er en las configuraziuns da l’app da Facebook ed Instagram. Alternativamain han blers utilisaders ed utilisadras retschavì in link direct tras ina notificaziun.
Uschia pudais far opposiziun sin Instagram
-
Bild 1 von 5. Avrir il menu da configuraziun sisum dretg sin Voss agen profil. Bildquelle: RTR.
-
Bild 2 von 5. Cliccar sin il buttun «Info». Bildquelle: SRF.
-
Bild 3 von 5. Tscherner la «decleraziun da protecziun da datas». Bildquelle: SRF.
-
Bild 4 von 5. Cliccar sin «widersprechen» pia «cuntradir». Bildquelle: SRF.
-
Bild 5 von 5. Inditgar l'adressa d'emagl e cliccar sin «senden». Ina giustificaziun na dovri betg. Suenter duess in messadi dad Instagram cumparer, che conferma quai. Bildquelle: SRF.
Entaifer tge termin sto l’opposiziun vegnir inoltrada? Il pli tard fin ils 26 da matg 2025. Suenter quest termin na pon datas eventualmain betg pli vegnir stizzadas dal process da trenament.
Jau na dovrel betg Instagram u Facebook, mo Whatsapp. Co poss jau far opposiziun? En quest cas n'èsi ni necessari ni pussaivel da far opposiziun: las conversaziuns sin Whatsapp èn gia privatas. Meta n’ha nagin access a quels cuntegns. Mo sch'ins interagescha activamain cun il chatbot d’intelligenza artifiziala da Whatsapp, pon datas vegnir duvradas per il trenament da Meta. Tgi che vul evitar quai, na duess simplamain betg utilisar quest assistent d’IA sin Whatsapp. Ultra da quai datti sin Whatsapp er ina pussaivladad generala da far opposiziun cunter l’elavuraziun d’infurmaziuns persunalas.
Sparischa l’assistent d’IA da Meta suenter l’opposiziun? Na. Il rintg blau-cotschen resta visibel. Cun l’opposiziun vegn be refusada la permissa che Meta dovra ils cuntegns publics da la persuna per trenar l’assistent d’IA. L’assistent vegn però activ en il chat be sche Vus cliccais sin il rintg u al clamais activamain cun in cumond.