Update 21 da matg
En la Emilia-Romagna èn 36'600 persunas vegnidas evacuadas. Quai han las autoritads talianas communitgà. En intginas regiuns da la Emilia-Romagna è la situaziun vinavant tendida – i vala vinavant il stgalim d'alarm il pli aut. Las autoritads quintan numnadamain vinavant cun plievgia. Muort questa situaziun da malaura en la Emilia-Romagna ha la primministra da l'Italia Giorgia Meloni annunzià da turnar pli baud a chasa da l'inscunter da G7 en il Giapun.
Update 20 da matg
Il president da la Confederaziun, Alain Berset ha scrit sur Twitter d'esser cun ils patratgs tar ils vischins en l'Italia en vista a las inundaziuns en il nord dal pajais. Berset ha exprimì la solidaritad cun las famiglias pertutgadas. Era ils proxims dis vala il pli aut grad d'alarm en blers lieus en l'Italia dal nord – anc adina èn en acziun la polizia, pumpiers, la protecziun civila ed il militar.
Pervi da midada dal clima
Vi da las malauras en l'Italia saja il carstgaun in conculpant, quai ha il geolog talian Maurizio Castellari ditg envers SRF. La terra saja dapi la segunda guerra mundiala vegnida betunada e cuverta memia fitg. Era flums na hajan betg pli avunda plaz per sa slargiar a moda natirala. Per Castellari saja era cler che l'Italia saja pertutgada fermamain da la midada dal clima. A mais da sitgira suondian curts temps da plievgia intensiva.
Cunzunt las citads Faenza, Cesena e Forlì èn pertutgadas fermamain. A Cesena han persunas spetgà sin ils tetgs da las chasas per vegnir spendradas. Er manischunz ch'èn stads serrads en da l'aua en lur autos han stuì vegnir spendrads.
Update 19 da matg
L'Italia patescha sut aura extrema
Durant l'enviern èsi stà extrem sitg en l'Italia. In scienzià ha explitgà en la gasetta taliana «Corriere della Sera»: Il terren saja stà setgentà suenter quai enviern. E perquai n'ha el betg pudì prender si la plievgia. La plievgia saja perquai culà en ils flums e lais en ina giada ed haja chaschunà las inundaziuns.
En la regiun Emlia-Romagna èn 21 dals 23 flums da la regiun culà sur lur cunfins ora. 250 bovas hai dà, 120 da quels cun grevs donns.
Millis persunas han stuì vegnir evacuadas, rapporta l'agentura da novitads taliana Ansa. En la citad da Senigallia en la vischinanza d’Ancona ha stuì vegnir rumida la recepziun d’urgenza da l'ospital pervi da l'inundaziun. Era las colliaziuns da tren tranter intginas citads en la vischinanza han stuì vegnir serradas. En tschertas citads èn per segirtad plinavant er las scolas vegnidas serradas.
