Il president russ Wladimir Putin haja giugà ina rolla activa cura ch'in aviun da passagiers è vegnì sajettà giu la stad 2014 sur l'ost da l'Ucraina. A questa conclusiun vegnan investigaders internaziunals suenter avair tadlà discurs da telefon.
Indizis ma betg avunda per ina persecuziun penala
I dettia ferms indizis che Putin haja decidì da metter a disposiziun als separatists pro-russ la racheta cun la quala l'aviun saja vegnì sajettà giu. In mussament direct ch'el haja dà ses consentiment per sajettar giu l'aviun na dettia dentant betg. Perquai na bastian ils mussaments er betg per ina persecuziun penala cunter Putin u cunter autras persunas suspectadas. Il team d'investigaziun di ch'ins haja cuntanschì ils cunfins e suspendà per entant las investigaziuns.
La Boeing da la Malysia Airlines era sin via dad Amsterdam a Kuala Lumpur. Ell'aveva 298 persunas a board – la gronda part ollandaisas. Nagin n'ha survivì.
