En Svizra investighescha la Procura publica federala pervi daners svizzers che sajan ids a la Hamas. Sco quai ch'il procuratur public federal Stefan Blättler ha ditg ad SRF, haja el instradà ina procedura penala. Quai però gia pliras emnas avant che la Hamas haja attatgà l'Israel. La rinfatscha concreta en la procedura penala saja d'avair sustegnì in'organisaziun terroristica.
Encunter tgi che las investigaziuns e rinfatschas giajan na tradescha Blättler però betg. Tenor atgnas indicaziuns per betg periclitar la procedura.
Cun scumond da la Hamas fissi pli simpel
Auter ch’en l’Uniun europeica n’è la Hamas betg scumandada en Svizra. Perquai sto la Procura publica federala far cler giuridicamain che la Hamas sto vegnir valitada sco organisaziun terroristica. Ils videos e las fotografias cleras dals malfatgs da la Hamas d'avant duas emnas n'han betg bastà per chattar cumprovas giuridicas. Engrevgiant saja il fatg, che la Hamas regia sper lur activitads terroristicas era in territori ed exequeschia en il medem mument activitads civilas.
Blättler è da buna speranza ch'ina condemnaziun saja pussaivla: «Ins po mussar si quai.» Ma la procedura vegn pretensiusa. Pli simpel fissan las chaussas per l'accusader da terror suprem da la Svizra, sch'il Cussegl federal declerass la Hamas sco organisaziun terroristica scumandada. Lura na duvrassi betg pli ina procedura da mussar si il terrorissem. Bain vul il Cussegl federal in tal scumond, ma ins na sa anc betg dir co e cura ch'el vul realisar quest scumond.