Siglir tar il cuntegn

Header

Navigaziun

cuntegn

Exteriur «Ipocrisia svargugnusa» – sa grittenta Juncker

Il president da la cumissiun europeica Jean-Claude Juncker ha renfatschà als pajais da l’UE da betg esser sincers tar la protecziun dals cunfins. Quai rapporta l'agentura da novitads SDA citond la gasetta «Welt am Sonntag».

Dunna cun placat.
Legenda: L'UE e la protecziun da ses cunfins en il focus – er tar questa dunna che protestescha al port da l’insla greca Lesbos cunter la politica da migraziun da l’UE. Keystone

En sia critica dovra il president da la cumissiun europeica Jean-Claude Juncker pleds clers: I saja ina «ipocrisia svargugnusa» co ch'ils pajais da l'UE giajan enturn cun la protecziun da lur cunfins.

Durant passa dus onns hajan tut ils schefs da stadi e regenza pretendì da proteger meglier ils cunfins exteriurs da l’UE – ed ussa hajan bleras parts dubis, ha Juncker ditg a la gasetta «Welt am Sonntag». Uschia na possia l’Europa betg funcziunar.

Il settember aveva la cumissiun da l’UE proponì 8'000 umens dapli che fin ussa per la reserva permanenta da la Frontex - l’autoritad per la protecziun dals cunfins. Blers pajais da l’UE eran critics envers quest plan.

Gia ier sonda avevan pliras medias cità ord il discurs, che Jean-Claude Juncker aveva manà cun la gasetta «Welt am Sonntag». En quel discurs aveva Juncker er plazzà ses dubis vi da la Rumenia sco pajais che presidiescha il Cussegl da l’UE a partir da l’entschatta da l’onn.

RR novitads 06:00+