Suenter che aderents dal manader religius Muktada al-Sadr èn entrads en il palazi da la regenza ed i ha dà cumbats cun milissas pro-iranaisas ha al-Sadr clamà enavos ses aderents. Quels èn suandads a sia supplica ed han chalà cun ils protests. La regenza ha puspè annullà il scumond da sortir. Almain 25 persunas èn mortas e 450 blessadas, tenor perditgas ed ospitals.
Ils cumbats han cumenzà glindesdi, cura che Muktad al-Sadr ha annunzià sia retratga da la politica. Il secretari general da l'ONU António Guterres, l'Uniun europeica e l'ambassadura da l'USA avevan reagì cun appels cunter la violenza. Mardi, durant in pled en la televisiun ha el declerà ch'ils eveniments hajan fatg trists el, ed el è sa perstgisà tar il pievel da l'Irac.
Glindesdi han aderents da Muktad al-Sadr assaglì il palazi da la regenza, igl ha dà fotografias cun aderents en il bogn avert dal palazi. Ils aderents èn entrads en la «zona verda», ina zona survegliada e segirada cun edifizis da regenza ed ambassadas.
Ad al-Sadr n'èsi betg gartegià da furmar ina regenza
Durant las elecziuns dal parlament avant 10 mais è il moviment dad al-Sadr stà il victur. Senza ses opponents che vegnan sustegnids da l'Iran n'ha el dentant betg pudì furmar ina regenza. Sin quai ha el pretendì el novas elecziuns, senza success.
Muktad al-Sadr appartegna a la minoritad religiusa sunnita en l'Irac. L’Iran e la gronda part dal Irac èn dentant schiitics. Al-Sadr e ses aderents vulan impedir che lur opponent Nuri al-Maliki che vegn era sustegnì da l'Iran, vegn puspè schef da la regenza. Gia dapi emnas protesteschan els sin via.
