Siglir tar il cuntegn

Exteriur Iran: Dus morts tar ils protests cuntinuants cunter il reschim

Tenor conferma da la televisiun statala iranaisa èn mortas duas persunas en ils protests cuntinuants. Pertge ch’ellas sajan mortas na saja anc betg sclerì scriva l’agentura da novitads svizra SDA.

Protests e polizists.
Legenda: Dapi la gievgia protesteschan Iranais cunter la politica d'economia e cunter il sistem da lur stadi. Keystone

Las duas persunas sajan mortas en il vest da l’Iran. Tenor l’uffizi dal guvernatur da la provinza Lorestan na saja la polizia iranaisa betg stada involvida tar il schabetg. Anzi dettia fastizs che mainian a la milissa da terror Stadi Islamic SI, pretenda il schef da segirezza da l’uffizi.

Iran vegnia ad agir cunter la derasaziun da violenza, tema e terror

Da vart uffiziala iranaisa aveva accentuà il minister Fasli en la televisiun statala, che tgi che disturbia l'urden e cuntrafetschia a la lescha stoppia sa responsar e pajar. Il stadi vegnia ad agir cunter la derasaziun da violenza, tema e terror.

Protests sa drizzan pli e pli encunter il sistem

Dapi la gievgia è la regenza iranaisa confruntada cun protests. Al cumenzament sa drizzavan quels envers la politica d’economia e da l’exteriur da la regenza dal president Hassan Ruhani.

Dapi lura èn ils protests vegnids pli e pli critics envers il sistem insumma. Er la sonda èn millis da persunas idas en l'entir pajais sin via.

RR novitads 09:00