En la chapitala iranaisa Teheran èn er la notg passada puspè bleras persunas idas sin via per demonstrar cunter la regenza. En blers lieus sajan abitants sa solidarisads da lur balcuns cun ils demonstrants. Tenor perditgas han las forzas da segirezza er sajettà sin abitaziuns. Durant ch’intgins dals demonstrants hajan pretendì in referendum hajan auters pretendì da cupitgar il reschim. Tenor observaders n’èsi betg probabel che la regenza fetschia concessiuns e decidia schluccadas socialas.
Ils protests èn ruts or suenter ch’ina giuvna da 22 onns è morta en arrest. Tenor la polizia da l’urden moral n’è ella betg stada vestgida tenor las reglas da l’islam. La dunna è morta ils 16 da settember en arrest da polizia. Dapi sia mort demonstreschan millis da persunas cunter il curs repressiv da la regenza e cunter il sistem d'autoritad islamc.