En l'Irlanda vegn la lescha che lubescha lètgs tranter pèrs omosexuals probablamain approvada. Quai annunzian observaturs da las votaziuns suenter avair dumbrà ina gronda part da las vuschs.
Ils adversaris da questa lescha han gia laschà valair lur terrada. L'Irlanda, il pajais ferm catolic, è cunquai l'emprim pajais che lubescha la lètg tranter pèrs omosexuals entras ina votaziun dal pievel. Radund 3,2 milliuns Irlandais èn stads clamads a l'urna. Il resultat final vegn spetgà il suentermezdi.