Siglir tar il cuntegn

Exteriur Ischs serrads tar bancas en Grezia

Las bancas greccas restan serradas fin glindesdi che vegn ils 6 da fanadur.

Grecs spetgan avant in automat per retrair daners.
Legenda: Tgi che ha daners en la Grezia, emprova dad ir per quels. Reuters

Quai han decretà il president grec, Prokopis Pavlopoulos ed il primminister Alexis Tsipras. Uschia èn las bancas serradas fin ch'il pievel grec ha vuschà davart las propostas dals crediturs internaziunals, la dumengia che vegn.

Retrair daners da l'automat pon ils Grecs mo pli 60 euros a di. Per visitaders da l'exteriur na vala questa restricziun betg, sch'els retiran daners cun ina carta or da lur pajais. Da quintar èsi dentant, ch'intgins automats da daners èn vids.

Ulteriuras mesiras

Avant aveva il primminister Alexis Tsipras confermà, d'avair ordinà controllas dal moviment dal chapital. Or da circuls da finanzas hai ultra da quai gì num ch'era la bursa ad Athen restia serrada. Enfin uss aveva la regenza dementà scenaris da serrar bancas, ubain da vulair introducir controllas dal moviment da chapital.

Il referendum e las consequenzas

Il venderdi aveva il primminister Alexis Tsipras annunzià in referendum davart las propostas dals crediturs internaziunals ed ina votaziun dal pievel davart il pachet da refurma proponì dals crediturs. Ils ministers da finanzas da la zona da l'euro han sinaquai decidì, da betg prolungar il pachet d'agid che scada la fin da zercladur.

Sustegn survegn la Grezia dentant vinavant da la Banca centrala europeica. Lezza ha decidì da cuntinuar ad interim cun ses agid d'urgenza, dentant senza schlargiar quel.

Accord anc pussaivel

In accord tranter la Grezia e la gruppa da la zona da l'euro saja anc adina pussaivel, quai manegia il cumissari d'economia da l'UE, il Franzos Pierre Moscovici. Ils crediturs internaziunals e la Grezia sajan mo intgins paucs centimeters in ord l'auter per chattar ina schliaziun, ha Moscovici ditg a la staziun da radio RTL.

La decleraziun da Moscovici, ch'il president da la cumissiun da l'UE Jean-Claude Juncker vegnia a suttametter da mezdi novas propostas ha ina pledadra da la cumissiun dementì.

RR Novitads 06:00