Sin il Lago Maggiore en il nord da l’Italia è sonda saira cupitgà in bastiment d’excursiun cun 25 persunas a bord. L'accident haja custà la vita a quatter persunas. Sfunsaders ed helicopters sajan stads en acziun. Quai han communitgà ils pumpiers. Il bastiment saja cupitgà sin autezza dal lieu Lisanza en il sid dal lai. Tenor las autoritads localas è il bastiment cupitgà pervi dad in turnigl da vent.
Bastiment chattà en profunditad da 16 meters
Tenor indicaziuns dal president da la regiun Lumbardia, Atillo Fontana, hajan turists prendì a fit il bastiment . Quai ha el communitgà sin la rait sociala Facebook. Sin il bastiment haja gì lieu ina festa d'anniversari. Suenter la disgrazia hajan 19 persunas pudì nudar a la riva, hai num da vart dals pumpiers. Il vrac dal bastiment saja vegnì chattà en ina profunditad da 16 meters.
Il Lago Maggiore è il segund grond lai da l’Italia ed ina destinaziun da vacanzas populara.
