Siglir tar il cuntegn
cuntegn

Exteriur Italia: Contractivas han fatg naufragi

En l'Italia han las contractivas per ina nova regenza fatg naufragi. Giuseppe Conte desista da furmar ina regenza da coaliziun cun la Lega ed il Movimento Cinque Stelle. Quai ha communitgà il secretari dal president dal pajais Sergio Mattarella. Conte desista uschia er sin il post da primminister.

purtret da Giuseppe Conte
Legenda: «mission impossible» - Giuseppe Conte bitta la fautsch en chanvà. Keystone

La raschun per il naufragi da la coaliziun è cunzunt la dispita davart l’elecziun da Paolo Savona sco minister d'economia e finanzas, perquai ch'el saja fitg critic envers la zona da l'euro e la Germania. Avant aveva il schef dal stadi, Matarella, exprimì ses veto cunter l'elecziun da Savona.

Conte ha uschia tratg las consequenzas dal veto da Mattarella cunter la proposta da Paolo Savona sco minister d'economia. La Lega ha vulì insister per tut pretsch sin Savona. – Dapi la fundaziun da la Republica taliana il 1946 n'hai anc mai durà uschèditg da furmar ina nova regenza.

Envidà Cottarelli

Per glindesdi ha Mattarella envidà l'expert d'economia Carlo Cottarelli per discurs, uschia ha ditg in pledader. Quai pudess muntar che Mattarella planisescha ina regenza transitorica fin ch'i dat elecziuns novas.

En l’Italia sto il president l’emprim approvar il cabinet, avant che lez po vegnir elegì dal parlament. Tant per la Lega sco er per il Movimento Cinque Stelle è la decisiun da Mattarella in’attatga sin ils principis d’ina democrazia.

RR novitads 21:00