Il schef da la protecziun civila, Fabrizio Curcio, ha ditg che quai saja la stimaziun actuala. Prioritad saja uss da guardar che las radund 2'500 persunas pertutgadas possian bandunar las tendas provisoricas tant pli spert. Fin l’autra primavaira duain vegnir construids bungalows per dar in suttetg als pertutgads.
L’avust ha in ferm terratrembel en la regiun da Lazio procurà per 297 unfrendas – quai surtut en las vischnancas d’Amatrice ed Accumoli.
Terratrembels posteriurs
La regiun da Lazio ch`è stada pertutgada l'avust d'in grev terratrembel en l'Italia centrala na vegn betg a ruaus. La notg sin mardi èsi danovamain vegnì registrà in terratrembel cun la fermezza da 4,1. Quai rapporta l'institut talian per geologia e vulcanologia. Silsuenter haja quai dà plirs terratrembels posteriurs. L'epicenter è stà tranter las vischnancas d'Amatrice ed Accumoli ch'èn vegnidas destruidas dad in terratrembel l'avust. 297 persunas eran mortas.
Las novas stremblidas han procurà per panica tar las radund 850 persunas che vivan anc adina en in champ da tendas provisoric. A partir da la fin da questa emna duai quest champ vegnir demontà per motivs da segirezza. Quai han communitgà las autoritads localas.
Blers abitants d’Amatrice na vulan però betg bandunar lur vischnanca. Auters abitants èn sa declerads pronts da star provisoricamain en hotels fin che bungalows vegnan construids la primavaira proxima.
RR novitads 14:00
