Plirs vitgs en l'Austria èn isolads e pervi da la ferma plievgia e las navadas è la situaziun en general tendida en las regiuns Kärnten e Tirol. Uschia èn stads serrads giu en Kärnten il Lesachtal, il Mölltal sco er la vischnanca Heiligenblut. En il Tirol da l'Ost èn il glindesdi las scolas serradas pervi da aut privel da lavinas.
La vischnanca Stadl an der Mur en la Steiermark vala dapi dumengia saira sco territori da catastrofa. Gia il suentermezdi eran 15 chasas vegnidas evacuadas pervi da privel da bovas.
En la vischnanca Bad Gastein en il bundesland Salzburg è la notg sin glindesdi ida giu ina bova sin duas chasas abitadas. Duas persunas han pudì vegnir salvadas. En l'entir bundesland èn fin dumengia a las 19:30 var 80 bajetgs vegnids evacuads.
Situaziun a Venezia sa calma
Ed er en parts da l'Italia procura la malaura per gronds problems. Privel d'aua gronda regia en la regiun da Bologna ed en la Toscana. A Venezia percunter sa quietescha la situaziun cun l'aua.
Per caos han navadas procurà ier en il Tirol dal Sid. En la gronda part da la regiun èn crudads dapi la dumengia a bun'ura tranter 50 e 70 liters plievgia u naiv pro meter quadrat.
Tant en l'Italia sco en l'Austria vegni dentant puspè a plover u a naiver - davent da questa saira.
RR novitads 06:00