Il president, Giuseppe Conte era s'instruntrà cun ils dus vice-schefs da regenza Matteo Salvini e Luigi Di Maio per discutar il pachet da finanzas. «Las finamiras ch'èn gia vegnidas definidas èn anc vegnidas confermadas», hai gì num en ina posiziun dals trais politichers. Or da circuls da la regenza hai dentant tunà uschia che la finamira da deficit pudess anc vegnir sbassada en connex cun l'analisa da custs.
Italia aveva signalisà bainvulientscha
En la dispita da preventiv cun l'Uniun europeica aveva la regenza taliana sco ultim signalisà da vulair far concessiuns. Tenor dus insiders haja la regenza proponì da sbassar il deficit per l'onn proxim fin sin 2,0% dal product interiur brut (BIP). Enfin uss han els gì 2,4% sco finamira. Quai fiss stà trais giadas tant sco quai che la regenza precedenta aveva planisà. Ord vista da la cumissiun da Brüssel è quai memia bler.
L'Italia sesa sin in mantun da daivets da radund 130% da lur product interiur brut (BIP). Las autoritads da Brüssel avevan refusà l'emna passada il preventiv, perquai ch'el cuntrafetschia a reglas da l'UE. Per l'Italia pudessi dar perquai in chasti da 3,4 milliardas euros.
RR novitads 06:00
