Italia suenter terratrembels – passa 25’000 senza suttetg

Pervi dal privel da terratrembels posteriurs han millis da persunas passentà la notg en alloschis d’urgenza, en tendas, autos, trens u tar amis. Malgrà in terratrembel cun ina fermezza da 6,5 en dumengia n'haja dat nagins morts. 20 persunas èn vegnidas blessadas.

Ina charta da l'Italia, la staila amez mussa l'epicenter. Bild in Lightbox öffnen.

Legenda da maletgs: L'epicenter dal terratrembel en la regiun da l'Umbria, sin la charta da l'observatori dals Stadis Unids USGS. Earthquake.usgs.gov

Suenter ils grev terratrembel dad ier en damaun en l’Italia centrala han var 8’000 persunas passentà la notg en alloschis d’urgenza. Bleras persunas han era pernottà en tendas, autos u tar amis. Las autoritads avevan ditg a la glieud da bandunar ils lieus pertutgads dal terratrembel.

Sulettamain en la regiun Le Marche è il dumber da las persunas senza tetg creschì sin 25’000. Schebain ch’il terratrembel cun ina fermezza da 6,5 è stà il pli ferm en l’Italia dapi l’onn 1980 ha i dà mo paucs blessads. Ma il donn material è grond.

Il primminister Matteo Renzi ha empermess che tut las chasas e baselgias vegnian puspè reconstruidas suenter questa ulteriura squassada.

Plirs terratrembels posteriurs

Suenter il grev terratrembel avevi dà tenor l'institut da geologia e vulcanologia anc dus ulteriurs terratrembels cun ina magnituda da 4,6 e 4,1. Ils novs terratrembels han chaschunà problems considerabels sin la via consulara che collia Roma cun l'Umbria. A Roma è la metrovegnida messa ord funcziun pervi da controllas vid las lingias.

Tar la fermezza dal terratrembel avevi dà la damaun differentas indicaziuns. L'institut talian da geofisica e vulcanologia ha discurrì d'ina fermezza da 6,1. L'observatori dals Stadis Unids USGS ha annunzià ina fermezza da 6,6, l'observatori a Potsdam, Helmholtz-Zentrum ha discurrì d'ina fermezza da 6,5 sco era il center per seismologia da l'europa e la Mar Mediterrana.

Paders da basilica S. Benedetg èn en segirezza

Sin lur pagina d'internet scrivan ils paders da la basilica da S. Benedetg a Norcia ch'els sajan tuts en segirezza. La basilica istorica saja l'origin dal S. Benedetg ed è destruida cumplettamain.

RR novitads 08:00